February 2018 ~ I Love Cambodia

Sunday, February 25, 2018

ប្រធានាធិបតីហ្វីលីពីន ស្ថិតក្នុងចំណោមមេដឹកនាំពិភពលោកមិនគោរពសិទ្ធមនុស្ស

កាលពីថ្ងៃព្រហស្បតិ៍ អង្គការលើកលែងទោសអន្តរជាតិ បានដាក់លោក រ៉ូឌ្រីហ្គោ ឌូថើតេ (Rodrigo Duterte) ប្រធានាធិបតីហ្វីលីពីន ស្ថិតនៅក្នុងចំណោមមេដឹកនាំពិភពលោក ដែលអនុវត្តន៏ការគោរពសិទ្ធិមនុស្សនោះ មិនបានល្អជាទីបំផុត នេះជារយៈពេល២ឆ្នាំជាប់គ្នាហើយ របស់លោក រ៉ូឌ្រីហ្គោ នៅពេលអង្គការលើកលែងទោសអន្ដរជាតិ ចេញរបាយការណ៍ប្រចាំឆ្នាំរបស់ខ្លួន។

កាលពីថ្ងៃព្រហស្បតិ៍ អង្គការលើកលែងទោសអន្តរជាតិ បានដាក់ឈ្មោះប្រធានាធិបតីហ្វីលីពីន លោករ៉ូឌ្រីហ្គោ ឌូថើតេ Rodrigo Duterte អោយស្ថិតនៅក្នុងចំណោម

មេដឹកនាំពិភពលោក ដែលអនុវត្តន៍ការគោរពសិទ្ធមនុស្សមិនបានល្អជាទីបំផុត។

នេះជាការជាប់ឈ្មោះនៅក្នុងបញ្ជីជាមេដឹកនាំ ដែលគោរពសិទ្ធមនុស្សមិនបានល្អ ២ឆ្នាំជាប់គ្នា ហើយរបស់

ប្រធានាធិបតីហ្វីលីពីនរួបនេះ។ អង្គការលើកលែងទោសអន្តរជាតិ បានលើកឡើងថា ការចាត់ឈ្មោះលោករ៉ូឌ្រូហ្គោ ឌូថើតេ នៅក្នុងបញ្ជីមេដឹកនាំពិភពលោក ដែលអនុវត្តន៍ការគោរពសិទ្ធមនុស្សមិនបានល្អជាទីបំផុត ក៏ព្រោះថា ហ្វីលីពីនមានបញ្ហា យុទ្ធនាការបង្ក្រាបគ្រឿងញៀន

របស់លោកប្រធានាធិបតីហ្វីលីពីន ដែលបង្កអោយកើតមានការសម្លាប់មនុស្ស និងវិធានការបិទគេហទំព័រសារពត៌មានដែលបានរិះគន់ដល់សង្គ្រាមគ្រឿងញៀនរបស់ប្រធានាធិបតិហ្វីលីពីនរូបនេះ៕

ប្រភព ៖ http://www.ptv.com.pk/public/userView/ptvWorld/engNewsDetail/14449

ប្រធានាធិបតីបារាំងផ្ញើសាររំលែកទុក្ខជូនក្រុមគ្រួសារយោធិនដែលស្លាប់នៅប្រទេសម៉ាលី

ប្រធានាធិបតីបារាំង លោកម៉ាក្រុង បានផ្ញើសាររំលែកទុក្ខជូនក្រុមគ្រួសារទាហានបារាំង២នាក់ ដែលស្លាប់ពេលបំពេញបេសកកម្មនៅប្រទេសម៉ាលីក្នុងនាមជាកងរក្សាសន្តិភាព, ហើយទទួលរងការវាយឆ្មក់ពីសំណាក់ពួកឧទ្ទាមពេលពួកគេធ្វើដំណើរដោយរថយន្ត។

លោកម៉ាក្រុងថ្លែងនៅចំពោះមុខអ្នកកាសែតថា លោកសូមសម្ដែងមរណទុក្ខដ៏សែនក្រៀមក្រំបំផុតជូនចំពោះក្រុមគ្រួសារយោធិនពលីជីវិតទាំង២រូបដែលទទួលមរណភាពកាលពីព្រឹកមិញនៅប្រទេសម៉ាលី ដែលស្ថិតនៅទ្វីបអាហ្វ្រិកភាគខាងលិច។ សូមបញ្ជាក់ថានៅពេលបច្ចុប្បន្ននេះ កងរក្សាសន្តិភាពរបស់បារាំង៤ពាន់នាក់កំពុងឈរជើងនៅតំបន់មួយនៃប្រទេសម៉ាលី ដើម្បីប្រយុទ្ធប្រឆាំងនឹងពួកជ្រុលនិយម។ បារាំងចាប់ផ្ដើមធ្វើអន្តរាគមន៍យោធានៅប្រទេសម៉ាលីជាលើកដំបូងកាលពី ឆ្នាំ២០១៣ ដើម្បីបោសសម្អាតពួកភេរវកម្មដែលងើបបះបោរ ដើម្បីដណ្ដើមអំណាចពីរដ្ឋាភិបាលម៉ាលី៕
ប្រភព ៖ https://ph.news.yahoo.com/2-french-soldiers-killed-mali-mine-blast-154011091.html

លោកដូណាល់ត្រាំគាំទ្រឲ្យគ្រូបង្រៀនមានសិទ្ធិកាន់កាំភ្លើងពេលបង្រៀនសិស្ស

លោកដូណាល់ត្រាំបានបង្ហាញទស្សនៈផ្ទាល់ខ្លួនរបស់លោកពាក់ព័ន្ធនឹងករណីបាញ់ប្រហារយ៉ាងអនាធិបតេយ្យថាប្រសិនបើទៅថ្ងៃមុខ អាជ្ញាធរផ្ដល់សិទ្ធិឲ្យគ្រូបង្រៀនកាន់កាំភ្លើងខ្លី ប្រហែលជាគ្មានករណីបាញ់ប្រហារនៅក្នុងសាលារៀនតទៅទៀតទេ។ លោកថ្លែងបែបនេះបន្ទាប់ពីមានការបាញ់ប្រហារសម្លាប់មនុស្ស១៧នាក់នៅរដ្ឋផ្លរីដាកាលពីសប្ដាហ៍មុន។

ក្នុងឱកាសជួបសំណេះសំណាលជាមួយសិស្សដែលរងគ្រោះដោយសារការបាញ់ប្រហារនៅរដ្ឋផ្លរីដា, លោកដូណាល់ត្រាំថ្លែងថាមុនពេលបាញ់ប្រហារនោះ បើគ្រូបង្រៀនមានកាំភ្លើងនៅក្នុងដៃ ប្រហែលជាជនដៃដល់គ្មានឱកាសបាញ់ប្រហារដល់ថ្នាក់នេះទេ។ លោកក៏សូមទទួលស្គាល់ថាការផ្ដល់សិទ្ធិឲ្យគ្រូបង្រៀនកាន់កាំភ្លើងបែបនេះប្រហែលជាករណីប្លែកបន្តិចដែរ។ នៅទីបញ្ចប់ លោកសន្យាថានឹងតាមដានប្រវត្តិសាវតារ និងដើមហេតុដែលនាំឲ្យមានករណីបាញ់ប្រហារនេះ ហើយលោកក៏សង្កត់ធ្ងន់លើការយកចិត្តទុកដាក់ខ្ពស់ចំពោះសុខភាពផ្លូវចិត្តរបស់សិស្ស ដើម្បីជៀសវាងករណីនេះទៅថ្ងៃអនាគត៕
ប្រភព ៖ https://www.theguardian.com/us-news/video/2018/feb/21/trump-says-arming-teachers-with-concealed-weapons-could-prevent-school-massacres-video

កូរ៉េខាងជើងនឹងបញ្ជូនគណៈប្រតិភូទៅចូលរួមពិធីបិទបញ្ចប់ការប្រកួតកីឡាអូឡាំពិក

កូរ៉េខាងជើងនឹងបញ្ជូនគណៈប្រតិភូមួយក្រុមទៅកូរ៉េខាងត្បូង ដើម្បីចូលរួមពិធីបិទបញ្ចប់ការប្រកួតកីឡាអូឡាំពិករដូវរងានាថ្ងៃទី២៥ ខែកុម្ភៈ។ គណៈប្រតិភូនេះនឹងធ្វើដំណើរដោយរថយន្តកាត់ព្រំដែន ហើយស្នាក់នៅកូរ៉េខាងត្បូងរយៈពេល៣ថ្ងៃ មុននឹងវិលត្រឡប់ទៅមាតុភូមិរបស់ខ្លួនវិញ។ ខាងលើនេះជាការអះអាងរបស់ក្រសួងបង្រួបបង្រួមជាតិកូរ៉េ។

គណៈប្រតិភូកូរ៉េខាងជើងលើកនេះដឹកនាំដោយមន្ត្រីជាន់ខ្ពស់មួយរូប ដែលមានតួនាទីជាអ្នកទទួលបន្ទុកខាងកិច្ចការទំនាក់ទំនងរវាងកូរ៉េខាងជើង និងកូរ៉េខាងត្បូង។ លោកនឹងដឹកនាំគណៈប្រតិភូចូលជួបសម្ដែងការគួរសមជាមួយប្រធានាធិបតីកូរ៉េខាងត្បូងនៅក្នុងឱកាសនោះផងដែរ។ ដំណើរទស្សនកិច្ចនេះក៏កើតឡើងដំណាលគ្នានឹងដំណើរទស្សនកិច្ចរបស់គណៈប្រតិភូមួយក្រុមទៀតរបស់សហរដ្ឋអាមេរិក ដឹកនាំដោយកូនស្រីរបស់លោកដូណាល់ត្រាំទៅកូរ៉េខាងត្បូង។ ដូច្នេះ គេមិនទាន់ដឹងថាគណៈប្រតិភូទាំង២ក្រុមនេះនឹងជួបគ្នាឬយ៉ាងណានោះទេ៕
ប្រភព ៖ https://www.reuters.com/article/us-olympics-2018-northkorea/north-korea-to-send-delegation-to-olympics-closing-ceremony-meet-south-koreas-moon-idUSKCN1G60DL

ជប៉ុនគាំទ្រសេចក្ដីសម្រេចរបស់អង្គការពាណិជ្ជកម្មពិភពលោកចំពោះការនាំទំនិញចូលកូរ៉េខាងត្បូង

រដ្ឋាភិបាលជប៉ុនបង្ហាញការគាំទ្រយ៉ាងពេញទំហឹងចំពោះអង្គការពាណិជ្ជកម្មពិភពលោកដែលសម្រេចឲ្យជប៉ុនឈ្នះក្ដីពាក់ព័ន្ធនឹងវិវាទពាណិជ្ជកម្មរវាងជប៉ុន និងកូរ៉េខាងត្បូង។ ជប៉ុនបានដាក់ពាក្យប្ដឹង បន្ទាប់ពីកូរ៉េខាងត្បូងហាមនាំចូលកសិផល និងគ្រឿងសមុទ្រមួយចំនួនពីប្រទេសជប៉ុន ដោយសារតែគេសង្ស័យថាទំនិញទាំងនោះមានសារធាតុវិទ្យុសកម្ម។

អ្នកនាំពាក្យរដ្ឋាភិបាលជប៉ុនសង្ឃឹមថាបន្ទាប់ពីស្ដាប់សេចក្ដីសម្រេចនេះរួចហើយ, កូរ៉េខាងត្បូងនឹងផ្លាស់ប្ដូរគោលជំហររបស់ខ្លួន។ អង្គការពាណិជ្ជកម្មពិភពលោកទទួលស្គាល់ថាកូរ៉េខាងត្បូងដាក់បម្រាមលើទំនិញរបស់ជប៉ុនកាលពីមុននេះ គឺជាការសមហេតុផល។ ប៉ុន្តែបើកូរ៉េខាងត្បូងនៅតែអនុវត្តរបៀបនេះទៀត វាជាការរំលោភលើច្បាប់ពាណិជ្ជកម្មអន្តរជាតិ។ កូរ៉េខាងត្បូងហាមនាំចូលគ្រឿងសមុទ្រពីប្រទេសជប៉ុន បន្ទាប់ពីមានហេតុការណ៍ឆេះរោងចក្រនុយក្លេអ៊ែរនៅហ្វ៊ូគូស៊ីម៉ាកាលពីឆ្នាំ២០១១ ដែលបណ្ដាលឲ្យសារធាតុវិទ្យុសកម្មហូរចូលទឹកសមុទ្រ ហើយជ្រាបចូលទៅក្នុងខ្លួនរបស់សត្វសមុទ្រ៕

ប្រភព ៖ http://www.straitstimes.com/asia/east-asia/japan-welcomes-wto-ruling-on-s-koreas-fukushima-food-ban

កូនស្រីលោកដូណាល់ត្រាំធ្វើដំណើរទៅដល់កូរ៉េខាងត្បូងដើម្បីចូលរួមពិធីបិទបញ្ចប់កីឡាអូឡាំពិក

កូនស្រីលោកដូណាល់ត្រាំ លោកស្រីអ៊ីវ៉ាន់កា.ត្រាំ(Ivanka Trump) បានធ្វើដំណើរទៅដល់ប្រទេសកូរ៉េខាងត្បូងនៅរសៀលនេះ ដើម្បីត្រៀមចូលរួមពិធីបិទបញ្ចប់ការប្រកួតកីឡាអូឡាំពិកនៅទីក្រុងព្យុងឆាងនាថ្ងៃទី២៥ ខែកុម្ភៈ។ ការអញ្ជើញទៅកូរ៉េខាងត្បូងលើកនេះក្នុងនាមជាទីប្រឹក្សាជាន់ខ្ពស់របស់សេតវិមាន និងជាទីប្រឹក្សារបស់លោកដូណាល់ត្រាំ។

ថ្លែងប្រាប់អ្នកកាសែតពេលទៅដល់ព្រលានយន្តហោះកូរ៉េខាងត្បូង, លោកស្រីអ៊ីវ៉ាន់កា.ត្រាំគូសបញ្ជាក់ថាទស្សនកិច្ចរបស់លោកស្រីមានគោលដៅ២យ៉ាង- ទី១ដើម្បីលើកទឹកចិត្តកីឡាករសហរដ្ឋអាមេរិក និងទី២ ដើម្បីបង្ហាញថាប្រទេសយើងទាំង២នៅតែមានសម្ព័ន្ធភាពរឹងមាំជានិច្ច។ តាមពិត ដំណើរទស្សនកិច្ចនេះក៏ជួនគ្នានឹងដំណើរទស្សនកិច្ចរបស់គណៈប្រតិភូមួយក្រុមទៀតរបស់កូរ៉េខាងជើងផងដែរដឹកនាំដោយមន្ត្រីជាន់ខ្ពស់របសគណៈមជ្ឈិមបក្សកុម្មុយនិស្តកូរ៉េ៕

ប្រភព ៖ http://www.news.com.au/world/asia/ivanka-trump-arrives-in-south-korea-for-winter-olympics-closing-ceremony/news-story/b0dfedce3012e1bea872eeb6792ac50c

នាយករដ្ឋមន្ត្រីកាណាដាបំពេញទស្សនកិច្ចជាផ្លូវការនៅប្រទេសឥណ្ឌា

នាយករដ្ឋមន្ត្រីកាណាដា លោកចាស្ទីន.ទ្រូដូ ត្រូវបានទទួលស្វាគមន៍យ៉ាងកក់ក្ដៅបំផុតពីសំណាក់នាយករដ្ឋមន្ត្រីឥណ្ឌានៅក្នុងឱកាសដែលលោកបំពេញទស្សនកិច្ចជាផ្លូវការរយៈពេល៨ថ្ងៃនៅទីនោះ។ តាមគម្រោង ថ្នាក់ដឹកនាំទាំង២នឹងពិភាក្សាលើបញ្ហាសំខាន់ៗ និងធ្វើជាសាក្សីនៃពិធីចុះហត្ថលេខាលើអនុស្សារណៈយោគយល់គ្នាមួយចំនួនផងដែរ។

លោកទ្រូដូអញ្ជើញទៅប្រទេសឥណ្ឌាលើកនេះរួមជាមួយក្រុមគ្រួសារ និងបានដើរត្រួតពលនៅទីលានប្រធានាធិបតីដែលបន្សល់ទុកតាំងពីសម័យអាណានិគមអង់គ្លេស។ លោកចង់ពង្រីកទំនាក់ទំនងទ្វេភាគីរវាងឥណ្ឌា និងកាណាដាឲ្យកាន់តែស៊ីជម្រៅបន្ថែមទៀត។ លោកទ្រូដូក៏បានអញ្ជើញទៅគោរពវិញ្ញាណក្ខន្ធមហាបុរសរបស់ឥណ្ឌា លោកមហាត្មះគន្ធី ដែលបានធ្វើពលិកម្មដើម្បីសេរីភាព។ ថ្នាក់ដឹកនាំទាំង២នឹងពិភាក្សាអំពីវិស័យការពារជាតិ និងសេដ្ឋកិច្ចជាតិនាពេលបន្តិចទៀតនេះ៕
ប្រភព ៖ https://www.youtube.com/watch?v=mmDmGeu-OdA

នគរបាលជប៉ុនចាប់ខ្លួនមនុស្ស២នាក់ពីបទបាញ់កាំភ្លើងនៅខាងក្រៅអគាររបស់កូរ៉េខាងជើង

នគរបាលជប៉ុនចាប់ខ្លួនបុរស២នាក់កាលពីព្រឹកមិញ ពីបទបាញ់កាំភ្លើងជាច្រើនគ្រាប់ទៅលើទីស្នាក់ការកណ្ដាលរបស់សមាគមមួយដែលមានទំនាក់ទំនងជិតស្និទ្ធជាមួយរដ្ឋាភិបាលកូរ៉េខាងជើង។ រហូតមកដល់ពេលនេះ គេមិនទាន់ដឹងមូលហេតុពិតប្រាកដនៃការបាញ់បោះយ៉ាងអនាធិបតេយ្យខាងលើនេះទេ ព្រោះសំណុំរឿងកំពុងស្ថិតក្នុងដៃសមត្ថកិច្ច។

សាក្សីនៅកន្លែងកើតហេតុរៀបរាប់ថាបុរសទាំង២នាក់នោះបើកឡានទៅឈប់នៅក្បែរទីស្នាក់ការសមាគមកូរ៉េខាងជើងតាំងពីម៉ោង៤ភ្លឺ, រួចហើយគ្នាគេម្នាក់ដកកាំភ្លើងបាញ់នៅច្រកទ្វារចូល។ ក្នុងស្ថានភាពនេះ, នគរបាលដែលឈរជើងនៅក្បែរនោះក៏ចុះចាប់ខ្លួនជនដៃដល់និងបក្សពួករបស់ពួកគេជាបន្ទាន់ ពីបទបំផ្លិចបំផ្លាញទ្រព្យសម្បត្តិ។ សូមបញ្ជាក់ថាករណីបាញ់ប្រហារបែបនេះកម្រនឹងកើតមានណាស់នៅប្រទេសជប៉ុន ព្រោះជប៉ុនមានច្បាប់តឹងរ៉ឹងបំផុតចំពោះការកាន់កាប់កាំភ្លើង៕

ប្រភព ៖ http://www.businessinsider.com/japanese-police-arrest-2-suspected-of-shooting-pro-north-korean-compound-2018-2

មនុស្ស១៣នាក់បាត់ខ្លួនដោយសារការបាក់ដីនៅប្រទេសឥណ្ឌូណេស៊ី

មានហេតុការណ៍បាក់ដីដ៏គួរឲ្យភ្ញាក់ផ្អើលមួយនៅលើកោះជ្វានៃប្រទេសឥណ្ឌូណេស៊ី បណ្ដាលឲ្យមនុស្សយ៉ាងតិច៧នាក់ស្លាប់ និង១៣នាក់ទៀតបាត់ខ្លួន មិនដឹងថាស្លាប់ឬរស់នៅឡើយទេ។ ក្រុមអ្នកជួយសង្គ្រោះខិតខំស្វែងរកអ្នកបាត់ខ្លួនទាំងយប់ដើម្បីជួយសង្គ្រោះឲ្យទាន់ពេលវេលា, ពុំនោះទេ គេសង្ឃឹមតិចណាស់ថាពួកគេអាចនៅរស់រានមានជីវិត។

អ្នកនាំពាក្យគណៈកម្មការជាតិគ្រប់គ្រងគ្រោះមហន្តរាយប្រាប់ថាទោះបីក្រុមអ្នកជួយសង្គ្រោះខិតខំយ៉ាងណា ក៏មិនសូវ ជោគជ័យប៉ុន្មានដែរ ដោយសារតែពួកគេជួបនឹងឧបសគ្គជាច្រើន។ ឧទាហរណ៍ ពេលនេះកំពុងតែមានភ្លៀងធ្លាក់ខ្លាំង ធ្វើឲ្យសណ្ឋានដីមួយផ្នែកធំនៅតំបន់នោះចេះតែបាក់ច្រើនឡើងៗ។ ចំណុចមួយទៀត ដោយសារដីល្បាប់ហូរធ្លាក់ពីតំបន់ខ្ពស់ៗច្រើនពេក រហូតដល់កម្រាស់៥ម៉ែត្រទៅ២០ម៉ែត្រ។ ឥណ្ឌូណេស៊ីឧស្សាហជួបប្រទះហេតុការណ៍បាក់ដីជាញឹកញាប់នៅពេលមានភ្លៀងធ្លាក់ម្ដងៗ ព្រោះការកាប់បំផ្លាញព្រៃឈើធ្វើឲ្យដីគ្មានដើមឈើសម្រាប់ទប់ទល់នឹងការហូរច្រោះរបស់ទឹក៕
ប្រភព ៖ http://www.presstv.com/Detail/2018/02/24/553389/Indonesia-7-dead-13-missing-following-landslide

ហេតុការណ៍ផ្ទុះគ្រាប់បែកបែបភេរវកម្មនៅប្រទេសសូម៉ាលីសម្លាប់មនុស្ស១៨នាក់

មានហេតុការណ៍ផ្ទុះគ្រាប់បែកផ្ទួនៗគ្នា២គ្រាប់នៅប្រទេសសូម៉ាលី, បណ្ដាលឲ្យមនុស្ស១៨នាក់ស្លាប់ និង២០នាក់ទៀតរងរបួស។ ក្រោយពេលកើតមានហេតុការណ៍នេះបានបន្តិច, ក្រុមអាល់សាបាប (al Shabaab) ដែលជាក្រុមភេរវកម្ម និងជាចលនាប្រដាប់អាវុធ ដែលតស៊ូប្រយុទ្ធប្រឆាំងនឹងរដ្ឋាភិបាលជាយូរមកហើយ បានប្រកាសថានេះស្នាដៃរបស់ខ្លួន។

គេឃើញផ្សែងគ្រាប់បែកហោះហើរយ៉ាងខ្មៅងងឹតទៅលើអាកាស។ នគរបាលប្រាប់ថាគ្រាប់បែកទី១ផ្ទុះឡើង បន្ទាប់ពីភេរវជនបើកឡានទៅឈប់នៅជិតប៉ុស្តិ៍ឆែកឆេរមួយកន្លែង ហើយដកកាំភ្លើងបាញ់រះទៅលើកងសន្តិសុខដែលឈរជើងនៅទីនោះ។ ក្រោយពេលបាញ់តដៃគ្នាមួយប្រាវ, កងសន្តិសុខបានបាញ់សម្លាប់ពួកភេរវជន៥នាក់។ ក្រោយមក ក៏មានហេតុការណ៍ផ្ទុះគ្រាប់មួយគ្រាប់ទៀត ដែលគេបង្កៃទុកចោលនៅមុខសណ្ឋាគារមួយស្ថិតនៅមិនឆ្ងាយប៉ុន្មានពីវិមានប្រធានាធិបតី។ គេគិតថាចំនួនអ្នកស្លាប់អាចច្រើនជាងនេះ ព្រោះអ្នកខ្លះមិនអាចស៊ូទ្រាំនឹងមុខរបួសបានទេ៕

ប្រភព ៖ https://www.reuters.com/article/us-somalia-blast/two-car-bombs-explode-in-somali-capital-and-kill-18-people-idUSKCN1G720U

I Love Cambodia

Sunday, February 25, 2018

ប្រធានាធិបតីហ្វីលីពីន ស្ថិតក្នុងចំណោមមេដឹកនាំពិភពលោកមិនគោរពសិទ្ធមនុស្ស

មេដឹកនាំពិភពលោក ដែលអនុវត្តន៍ការគោរពសិទ្ធមនុស្សមិនបានល្អជាទីបំផុត។

នេះជាការជាប់ឈ្មោះនៅក្នុងបញ្ជីជាមេដឹកនាំ ដែលគោរពសិទ្ធមនុស្សមិនបានល្អ ២ឆ្នាំជាប់គ្នា ហើយរបស់

Saturday, February 24, 2018

ប្រធានាធិបតីបារាំងផ្ញើសាររំលែកទុក្ខជូនក្រុមគ្រួសារយោធិនដែលស្លាប់នៅប្រទេសម៉ាលី

លោកដូណាល់ត្រាំគាំទ្រឲ្យគ្រូបង្រៀនមានសិទ្ធិកាន់កាំភ្លើងពេលបង្រៀនសិស្ស

កូរ៉េខាងជើងនឹងបញ្ជូនគណៈប្រតិភូទៅចូលរួមពិធីបិទបញ្ចប់ការប្រកួតកីឡាអូឡាំពិក

ជប៉ុនគាំទ្រសេចក្ដីសម្រេចរបស់អង្គការពាណិជ្ជកម្មពិភពលោកចំពោះការនាំទំនិញចូលកូរ៉េខាងត្បូង

កូនស្រីលោកដូណាល់ត្រាំធ្វើដំណើរទៅដល់កូរ៉េខាងត្បូងដើម្បីចូលរួមពិធីបិទបញ្ចប់កីឡាអូឡាំពិក

នាយករដ្ឋមន្ត្រីកាណាដាបំពេញទស្សនកិច្ចជាផ្លូវការនៅប្រទេសឥណ្ឌា

នគរបាលជប៉ុនចាប់ខ្លួនមនុស្ស២នាក់ពីបទបាញ់កាំភ្លើងនៅខាងក្រៅអគាររបស់កូរ៉េខាងជើង

មនុស្ស១៣នាក់បាត់ខ្លួនដោយសារការបាក់ដីនៅប្រទេសឥណ្ឌូណេស៊ី

ហេតុការណ៍ផ្ទុះគ្រាប់បែកបែបភេរវកម្មនៅប្រទេសសូម៉ាលីសម្លាប់មនុស្ស១៨នាក់

Categories

Sample Text

Blog Archive

Blog Archive

ផ្នែកទំនាក់ទំនងសង្គមឆ្នាំទី៤

About Me

Popular Posts

អ្នកគាំទ្រខ្ញុំ

អ្នកចូលទស្សនា

My Videos