អ្នកទេសចរណ៍កូរ៉េខាងត្បូង បារម្ភចំពោះការបាញ់មីស៊ីលរបស់កូរ៉េខាងជើង

អ្នកទេសចរណ៍ជាជនជាតិកូរ៉េខាងត្បូងដែលទៅលែងតំបន់មួយជិតព្រំដែនប្រទេសកូរ៉េខាងជើងកាលពីថ្ងៃព្រហស្បតិ៍ បានបង្ហាញការបារម្ភរបស់ខ្លួនចំពោះការបាញ់មីស៊ីលរបស់ប្រទេសកូរ៉េខាងជើង។ កូរ៉េខាងជើងកាលពីថ្ងៃពុធ បានបាញ់មីស៊ីលហោះយ៉ាងខ្ពស់ទៅក្នុងអាកាសហើយធ្លាក់នៅជិតប្រទេសជប៉ុន។ ការបាញ់មីស៊ីលថ្មីៗបំផុតលើកនេះ ត្រូវបានកូរ៉េខាងជើងអះអាងថា ជាការបាញ់សាកល្បងប្រកបដោយជោគជ័យ ដែលអាចបាញ់ទៅដល់ទឹកដីសហរដ្ឋអាមេរិក។

អ្នកទេសចរណ៍កូរ៉េខាងត្បូងដែលសម្លឹងមើលទៅកាន់ទឹកដីរបស់ប្រទេសកូរ៉េខាងជើងពីទីក្រុងព្រំដែនផាជុ(Paju)បាននិយាយថា ពួកគេមានការបារម្ភចំពោះសកម្មភាពបង្កហេតុដោយការបាញ់មីស៊ីលរបស់ប្រទេសកូរ៉េខាងជើង ដែលការបាញ់មីស៊ីលនេះ ប្រហែលជានឹងអាចបង្ក អោយកើតមានសង្គ្រាមពិតប្រាកដ។

អ្នកទេសចរណ៍កូរ៉េខាងត្បូងឈ្មោះគឹម ដេហូ(Kim Dae-Ho) បាននិយាយថា «គ្រប់ពេលដែល កូរ៉េខាងជើងបាញ់មីស៊ីល   ខ្ញុំបារម្ភក្នុងនាមជាពលរដ្ឋកូរ៉េខាងត្បូងថា សហរដ្ឋអាមេរិកប្រហែលជាទម្លាក់គ្រាប់បែកលើកូរ៉េខាងជើង ហើយសង្គ្រាមប្រហែលជានឹងកើតឡើង»។

ការបាញ់សាកល្បងមីស៊ីលរបស់ប្រទេសកូរ៉េខាងជើង បានធ្វើឡើងនៅថ្ងៃពុធម៉ោង១និង៣០នាទីរំលងអាធ្រាត្រម៉ោងនៅកម្ពុជាថ្ងៃ២៩វិច្ឆិកា។ ការបាញ់មីស៊ីលលើកនេះ ជាការបាញ់លើកដំបូងចាប់តាំងពីពាក់កណ្តាលខែកញ្ញាមក។ ហើយក៏ជាការបាញ់លើកទី១ ដែលកើតឡើងមួយសប្តាហ៍ ក្រោយលោកដូណល ត្រាំ ប្រធានាធិបតីអាមេរិក បានដាក់ប្រទេសកូរ៉េខាងជើងចូលក្នុងបញ្ជីប្រទេសគាំទ្រភេរវកម្មដែលការដាក់ក្នុងបញ្ជីនេះ អាចអនុញាតិអោយមានការដាក់ទណ្ឌកម្មលើកូរ៉េខាងជើងបាន៕